الجمعة، 12 أكتوبر 2012

قالو لى



- انتى مش هترتاحى غير لما توصلى للى انتى عيزاه 
" دينا " صديقتى 

وقتها مش كنت عارفة انا عايزة اوصل لأيه 
يمكن كنت زعلانة علشان مش هكمل تمهيدى ماجستير 
يمكن كان نفسى ففرصة للظهور فى الشعر 
كنت عايزة اوصل ليا والحمد لله وصلت :)

......................................

- هو انتى فاكرة انك لما توصلى هتفتكرى حد ولا هتساعدى حد
اللى بيوصل مش بيفكر غير فـ نفسه 
" دكتور محمد " رفيق طريق العودة ذات يوم فى ميكروباص المنصورة 

لما قال كدا وعدته انى مش هتغير مهما كان وهساعد اى حد يحتاجلى 
يومها قالى ابحاثك دى تستاهل ماجستير مش تمهيدى متزعليش لما مش ينجحوكى 
فى بلدنا اللى بيستاهل لازم يتعبوه ويزهقوه وبعد حوار طويل وعند انتهاء الطريق 
قالى خليكى زى ما انتى اوعى تتغيرى وانا متأكد ان يوم من الايام هسمع أسمك واعرف انك نجحتى 
انا نفسى اوى اقابله تانى واعرف هو اخد الدكتوراه ولا لا واقوله
 انا فاكره وعد الطريق جدا وبنفذه الحمد لله :)

.....................................

- فرحانة بيكِ اوى وبكلم كل الناس عنك وبيستغربوا ايه جاب كفرالشيخ للشرقية 
نفسى افرجهم كتابك علشان يبقى اثبات على كل كلامى عنك 
" ألحاظ " صديقتى ولمزيد من الدقة مرآتى 

انا فرحانة بيكِ اكتر ودايما بحب اقول لكل الناس انك لحظتى المفضلة :))
واول ما استلم الكتاب هعمل حفلة فى المنصورة علشان اشوفكم كلكم 
وحشتينى اوى ووحشنى تحليلك ليا 

......................................

- سيدة البنفسج 
" رحاب الخضرى " حبيبتى 

أحلى لقب حصلت عليه علشان انتى مش اى حد 
انا بحبك جداااا وفرحنى اللقب جدا ربنا يخليكِ ليا يارب 

.....................................

- عايز اعملك مكتبة لوحدك فى بتنا نجمع فيها كتبك 
والهدايا كمان عايز افرح بيكِ أكتر 
" دكتور محمد " خطيبى وكدا يعنى :$

كل ما بفتكر كلامك ده وكل ما تعيده لما بنتكلم عن شقتنا بفرح اوى 
نفسى افرحك اكتر واكتر نفسى تفضل فرحان بيا كدا على طول 
فاكر بقى لما قولتلك ان اى حد بيكون مبسوط فى حالة الحب بس بتفرق فى الابواب 
انت دخلتى الحب من باب الحلم والحلم مالوش حدود ولا فيه حواجز 
انت اجمل حقيقة فى حلم حياتى 

.....................................

- متاكد/ة انك هتنجحى ان شاء الله 
" مصطفى سيف الدين & لبنى أحمد نور & نشوى عبدالمقصود " 

أنتم نقاط الضوء على طريق الحلم 

....................................

- يدوم عليكِ الخير يارب 
" ميسى سلطان " صاحبة رسالة متسائلة عن المئة تدوينة 

من فترة طويلة مش حد دعالى دعوة حلوة كدا 
يدوم عليكم الخير كلكم ياااااااااارب


" الصورة إهداء من حنان بتقول حستها انا  " 


13 التعليقات:

حنين محمد يقول...

صباح الغاردينيا آية
وحتنجحي بإذن الله لأنك أنسانة رائعة ومتفائلة وجواكِ أمل وعزيمة وحولك ناس بتحبك إبتداء من حبيبك وإنتهاء بكل صحابك بس افضلي انتي انتي مهما وصلتي بروحك الحلوةوإحساسك الجميل ربنا يوفقك ويسعد قلبك وأيامك .. بحبك جداً :) "
؛؛
؛
لروحك عبق الغاردينيا
كانت هنا
Reemaas

Lobna Ahmed Nour يقول...

ربنا يفرحك ويديم عليكي نقاء الروح وسلامة القلب يا آية
هتنجحي إن شاء الله :)

ليلى الصباحى.. lolocat يقول...

جدير بهذا القلب الممتلىء حماس ان ينجح ويتقدم دايما :)
اسأل الله لك كل فلاح ونجاح وتألق حبيبتى

تحياتى بحجم السماء

محمد سلامة يقول...

ربنا يديم عليكى الفرح وعلى رأى عمنا القذافى إلى الأمام :)

رؤى عليوة يقول...

جميلة أوى يا ايه

عارفه انا من شويه كنت بفكر اكلمك او ابعتلك رساله على الفيس عشان اقولك حبيتك من صوتك لما كلمتى لبنى فى اللقاء

اول ما تمسكى كتابك هتحسى اكتر بالنجاح ده

وجميل انك من المنصورة كده احنا كتييير بلديات عايزين نجمع بعض فى حفلة :)

اما عن اللى بيتقال لنا ويتحقق ده فعلا مبيتنساش ابدا واحساسة جميييييل اوى بمرورو الأيام

وعلى اد ما فيه اقووال جميله فيه العكس ولازم ننساها

دمت بخير وود

فيه دعوة بحبها

الله يسعدك ويرضى عليكى

aya mohamed يقول...

ريماس

انا بحبك جدا جدا والله
هنجح بوجودكم جنبى ان شاء الله
ربنا يسعد قلبك يا حبيبتى :*

aya mohamed يقول...

لبنى

بتشجيعك يا لبنى
بحبك انا :)

aya mohamed يقول...

ليلى الصباحى

تسلميلى يارب ويسلملى كلامك
ربنا يفرح قلبك يارب

aya mohamed يقول...

مسلم مصرى

اللهم آمين يارب
ربنا يديم الفرح على كل الناس
نورتنى

aya mohamed يقول...

رؤى

بعتلك انا المسج اول ما شفت الكومنت هنا
انا بحبك اكتر اصلا
وان شاء الله نتجمع قريب :)

مصطفى سيف الدين يقول...

معلش متأخر كعادتي اليومين دول
صدقيني يا آية انتِ تستحقي النجاح
و اكيد هتنجحي ان شاء الله
الف مبروك الكتاب
و عقبال الكتاب الالف
ربنا يسعدك دايما لأنك حد جميل و نقي

aya mohamed يقول...

مصطفى

مش مهم انك تتأخر المهم انك موجود
بتسعدنى دايما بكرمك الجميل يا مصطفى
ربنا يوفقك و يسعدك يارب

rona ali يقول...

انا فاتنى كتير كده ليه :)

من ناحيه هتنجحى فاكيد ان شاء الله

وبجد انتى تستاهلى كل خير فعلا
وتستاهلى اكتر من كده كمان

ربنا يديم عليكى االفرح والسعاده والرضا :)