السبت، 28 أبريل 2012

عن الخطوبة اتحدث


اول لما اتخطب هعمل حااجات كتير اوى وهكتب كلام كتير جدا 
بس بحاول افتكر ايه اللى كنت عايزه اعرف ولا فاكرة اى حاجة 
حتى الكلام مش راضى يجى مش عارفة بقى المشكلة فين بالظبط 
كنت بفضل اكتب لفارس احلامى احلى كلام رومانسى ولما جه الفارس ضاع الكلام :)
" لا لشئ سوى انك فوق الوصف والتصوير "
......................................................

هى : ده خطيبها متدين اول ما اتخطبوا قالها لازم تصلى ركعتين شكر ان ربنا كرمك بيا 
انا :  ههههههههه طيب والله كويس 
هى : وقالها ان هو كمان هيصلى يعنى 
انا :  لا كدا عداه العيب بصراحة 
 هى الصلاة مدعاه للتباهى ولما اكون بشكر ربنا على نعمة ازاى حد يجبرنى على كدا 
جميل ان خطيبك يكون متدين وعارف ربنا بس الاجمل ان الصلاة تكون باحساسك وقلبك وكل مشاعرك 
بتصلى شكر علشان حاسة من جواكى انه نعمة من ربنا وبتشكريه عليها 
" الصلاة مش ركعتين ونسلم الصلاة ان كل حواسك تسلم "

.............................................................

وانا ف الكلية لما كنت بشوف بنت وولد ماشيين مع بعض ويجيبلها ورده 
ويعزمها ف كافية ويشتريلها الدبدوب اللى بتحبه من المحل اللى قدام الكلية 
ويشبكوا ايديهم ويفضلوا ماشيين ف الطريق الطويل ده اللى مليان شجر لحد محطة القطر 
كنت بقول لنفسى ان شاء الله لما اتخطب ويبقى عندى الولد بتاعى هنعمل كدا
واهم حاجة يمشينى على الكورنيش ف المنصورة نظرا لان مفيش عندنا كورنيش 
بس لما اتخطبت وبقى عندى الراجل بتاعى مش نافع نخرج سوا ولا اى حاجة 
ومع ذلك مش زعلانة ان احلامى مش اتحققت بالعكس فى حاجات تانية لقيتها اجمل حصلت 
انى اعمله الاكل بايدى وافضل استناه يجى ويبقى مكسوف يسلم عليا ولا لا 
وقتها بقول هما ازاى بيبقى سايبين ايديهم ف ايدين بعض اذا كان احنا مكسوفين نسلم :)))
" ادق تفاصيلك معى اجمل من كل مراهقات الجب "
..........................................................

هى : هو انتى اتخطبتى بجد 
انا : اه هى دى فيها هزار 
هى : اصل مش حطيتى صورة اديكم بالدبل ولا باين ف صورة البروفيل ولا الكافير اى حاجة 
انا : مش بحب الحركات دى ما انا غيرت الريبليشن مش كفاية يعنى 
هى : فى ناس بتغيرها وبتكتب اسامى لاطفال قريبهم او اخوتهم او بباهم حاجات كدا يعنى 
انا : بس انا واضحة وصريحة واحيانا عاقلة 
مش علشان مش حابه احط صورة صوابعنا يبقى اللى بيعمل كدا مش بيعجبنى لا بالعكس 
وبحب جدا البروفيلات اللى كلها حب ورومانسية 
بس مش معنى ان كل اللى بيتخطبوا بيعملوا كدا يبقى انا اعمل كدا 
" مميزة بإختلافى "

.............................................................

الخطوبة فترة مهمة جدا فى حياة اى اتنين بيقرروا يكونوا مع بعض لاخر العمر 
مينفعش تبقى اهم حاجة فيها ان صحابك يبقوا معجبين بخطيبك ولا ان الناس تقولك 
خطيبك امور وطيب ومتدين ومحصلش الاهم انك تصدقى انه محصلش 
وتحسى بجمال روحه وتقتنعى انه فعلا متدين و تكتشفى ف تصرفاته انه بجد طيب 
المهم انك تعرفى عيبوبه قبل مميزاته علشان تشوفى هتقدرى تستحمليها باقى عمرك ولا لا 
اختبريه واستفزيه وشوفى هتتصرفوا ازاى دققى فى كل تصرفاته وحلليها 
علشان مش تيجى بعد الجواز وتقولى انا اول مرة اعرف انه عصبى او غيور او او او 
وملحوظة صغيرة اوى كدا على الماشى كل الرجاله زى بعض المقولة دى صحيحة مليون المية 
زى بالظبط ما كل الستات زى بعض زى بردو ما كل البشر زى بعض بس فى شوية فروق فردية 
اهتمى بقراءة السيرة النبوية و اقرى عن الصحابة واقرى فقه المعاملات 
استغلى الفترة دى فى انك تتعرفى على خطيبك وانك تجمعى معلومات تفيدك ف حياتكم بعد كدا
يمكن الكلام ده مش بقوله لحد علشان مش تقولوا بتفلسف وشغاله نصايح 
بس بقوله لنفسى كمان علشان لما انسى اجى هنا افتكر ومش ابقى بناقض نفسى 
" يااااااااارب كل اللى مش اتخطبوا يتخطبوا واللى اتخطبوا يتجوزوا على خير باذن الله "

......................................................................

هى : دبلتك مش شفت حد لابسها قبل كدا 
انا " ولا انا بردو بقيت كل ما اسلم على واحدة اركز ف دبلتها علشان اشوف حد لابس زيها ولا ايه 
هى : بس جميلة اوى دبلتك هو انتى ليه مش بتلبسى اى حاجة من الشبكة 
انا : بحب الدبلة اكتر حاجة 
" علشان الدبلة هى الحاجة الوحيدة ف الشبكة اللى مكتوب جواها اسمه " 

........................................................................

مش بحب كلام الحب الكتير على الفيس والدلع الزيادة حتى لو متجوزين مش بس مخطوبين 
بحس ان دى اسرار مينفعش تبقى قدام كل الناس كدا 
لقيت بنات كتير متفقة معايا فى النقطة دى واللى سمتها " الدلال العلنى "
وحبيت بردو اسجل اعتراضى ليها هنا واعرف رايكم كمان 
" للقلوب حرمات كما للبيوت "

...........................................................................

نكتفى بهذا القدر وتصبحوا على امنيات محققة 
ان شاء الله


16 التعليقات:

rona ali يقول...

اختبريه واستفزيه وشوفى هتتصرفوا ازاى دققى فى كل تصرفاته وحلليها

عجبتنى الحته دى اوى حكم انا من محبي الاستفزاز يا اختى

بصي يا آيه كلامك كله عجبنى جدا ترتيبه واختيارك لحاجات اللى نقرأها كمان

مسالتين عجبونى اوى وكنت بفكر فيهم موضوع الصور انا كمان مش من مفضيلنها وحابه تكون الصور اللي بينا دى ليا انا محدش هيشوفها ويفهم موقف لقطتها غيري علشان كده هتكون مميزه علي قلبي :)

الدلال العلنى انا مش من محبينه خالص بس برضوا زيك مش بضايق لما بشوفه وبلاقي ناس بتعمل كدة بس ع خفيف فبقول تمام
بس اعتقد انا ممكن اشجعه فترة الجواز اكتر ولو انى هحس برضوا بشئ غلط لو انا اللي بعمل كده ههههههههه

الاهم في الاخر انا من كلامك حاسيت احساس كدة غريب حاسيت ان موضوع حد يفهمنى دة صعب وانى افهم حد صعب لان ربنا اكيد هيدينا شخصيه صعبه في تفكيرها احيانا ومتطرفه في حاجات احيانا وغريبه في مواقفها وتعاملاتها زي اكيد هتمرمط يا سعيد هههههه

ربنا يوفقكم يا يويو وتتهنوا ويرزقكم الصالح ليكم دايما :)

Unknown يقول...

أيه بجد بوست ده رائع جدا وحاجات كتير اوى منه بتحصل معايه تصدقي أني انا كمان بحب جدا فكرة انى ألأبس الدبله بس وكمان حلمت بحاجات كتير اوى كان نفسي أعملها معاه بس مش عملتها لكن عملت و أكتشفت أن في حاجات كتير أوى أجمل ميت من اللى كنت بحلم بيه هو عملهالى ربنا يوفقنا جميعا ويجعلهم لينا أزواج صالحين ويرزق كل البنانيت اللى لسه مجلهمش نصيب بأزواج صالحين

مصطفى سيف الدين يقول...

مشكلتنا في الزمن ده ان الواد و البنت بيتخطبوا علشان يعملوا بوتوكلات الخطوبة اللي انتي وضحتيها يمسك ايدها في الشارع و يتكلمو في التليفون سبعتاشر ساعة يحطوا صور الدبلة في البروفايل
و ينسوا اهم حاجة
ان الخطوبة هي اللي بتعرفك اكتر على الآخر

البوست هايل يا آية

أع ـقل مـ ج ـنـونــة يقول...

مبروك يا آية لو انها جت متأخرة ..
عارفة
انا اول ما اتخطبت برده اتمنيت اكتب حاجات كتير
ومعرفتش
في كل موقف حلو بيني وبينه بحاول اكتب مبعرفش !!
موضوع الاستفزاز دا بيحصل كتير
ههههههه
اه مننا
ان كيدنا عظيم :D
مبحبش موضوع الصور برده والرومانسية العلنية اصلا
بس احيانا بتحط ف موقف كدا بيظهر فيه العلنية دي كل ميت سنة مرة ههههههههه
دا مرة كنا زعلانين فكتبلي ع بوست ع الفيس بحبك
شوفته بعد ما اتصالحنا
رديت عليه ب شكرا ^_^
:D

انا البوست بتاعك دا عاجبني اوي
خلاني ابتسم ابتسامة كبيرة اووي ^_^
ربنا يتمملك بخير ياقمر^_^

ليالي باريس يقول...

أنت تحصرين الخطوبة بين مساحة أحلامك وما يتطلبه الشكل الإجتماعي
وتحصرين أحلامك في نسخة مكررة عما كنت ترينه خارج البيت

إذا كانت الخطوبة فترة تحضرية للزفاف فهي فترة تجربية لك إذا كتمت أحلامك ورغباتك مهما كانت تافهة وبسيطة

ألف مبروك
بتمنى تكوني سعيدة

سلام

maioya يقول...

مبروك الخطوبه ياأيه ربنا يكملك بخير
وعقبال الفرح الكبير ان شاءالله
وساعتها هاتعرفي ان الفتره التجريبيه بتاعه الخطوبه حاجه وفتره الممارسه في الجواز حاجه تانيه خالص :D
ربنا يوفقك ويحققلك اللي بتتمنيه :)

aya mohamed يقول...

رنا

حبيبتى يا رونى ميرسى على كلامك
احب اقولك من موقعى هذا ان لما
بيحصل النصيب هتلاقيه فاهمك على طول وكل الحاجات جميلة باذن الله
ربنا يسعدك يا حبيبتى يارب

aya mohamed يقول...

منة

الارائع وجودك يا مونمون
اللهم آمين يا حبيبتى ربنا يهديهم لينا يارب ويباركلنا فييهم
ويباركلهم فينا ويرزق كل البنات أزواج صالحين يارب

aya mohamed يقول...

مصطفى

معاك حق والله فعلا
ربنا يهدى كل الولاد والبنات
ويكونوا واقعيين اكتر فى الفترة دى ويعرفوا يستفادوا منها
ربنا يوفقك يا مصطفى ويسعدك يارب :)

aya mohamed يقول...

ريمو

الله يبارك فيكى يا حبيبتى ولا يهمك
هههههه اكيد طبعا ان كيدنا عظيم
انا عجبنى كومنتك جدا
ربنا يخليكى يارب ربنا يسعدك يا حبيبتى

aya mohamed يقول...

ليالى باريس

الله يبارك فيك يارب
ميرسى جدا لرأيك
دمت بخير دائما

aya mohamed يقول...

مى

ميرسى يا مى ربنا يبارك فيكى
وفرحنى بجد الكومنت
ربنا يسعدك دايما :)

حنين محمد يقول...

صباح الغاردينيا آيه
اولاً وحشتيني ثانيا عارفة أني قريت البوست أكتر ن مرة وفي كل مرة ببتسم وبقول بجد بجد روعة "
؛؛
؛
لروحك عبق الغاردينيا
كانت هنا
reemaas

aya mohamed يقول...

اولا وحشتينى جداااااااامش مصدقة انك اخيرا دخلتى عندى ههههه
بجد كنتى وحشانى اوى
وميرسى ليكى يا حبيبتى انتى اللى رائعة

غير معرف يقول...

جمع الله بينكما وأتم عرسكما وعسى البهجة ألا تغادر حياتكما أبدًا

aya mohamed يقول...

أحمد شريف

اللهم آمين يارب
ميرسى على الدعوة الجميلة دى :)