الخميس، 18 يوليو 2019

حالة خاصة جدا



صباح مناسب للبدايات الجديدة، للتخطيط والتدريب والمذاكرة
محتاجة أدون النهاردة علشان أفتكر أنه أول يوم فعلياً في التدريب على الشغل الجديد واللي في نفس الوقت مختلف ومهم 
من سنتين تقريبا كنت محددة هدف أني أكون واحدة من الفريق ده رغم ان الموضوع وقتها كان صعب 
قرار النقل تقريبا بقاله اكتر من 6 شهور وكل شهر يقولوا الشهر الجاي، 
النهاردة رسمياً بقيت واحدة من أفراد الفريق وقدرت أحقق هدف كبير بالنسبالي الحمد لله
الحمد لله حمداً كثيراً


بعد كام يوم هيكون أول عيد ميلاد لبابا وهو مش معانا، يمكن بابا من بعد جوازى وهو أتغير كتير في معاملته معايا
هو مش يمكن هو فعلا اتغير، دموعه يوم الفرح اللي خلت كل الناس تعيط 
مكالماته ليا وسؤاله المستمر هتيجي أمتى، اتصاله طول الطريق بقيتي فين.. وصلتي ولا لسه
وقت ما قلت خلاص هسافر علشان الولادة وانه يجي مخصوص ياخدني ونرجع في نفس الوقت حتى من غير ما يقعد دقيقة
ارتباطه بمريم وهي كمان كل التفاصيل اللي بتبيجي في بالي دايما، واستغرابي دايما ليه مش كان كدا طول الوقت
في ناس بيبان حبهم واهتمامهم اكتر لما بنبعد، يمكن انا بالذات كان باين من الاول قد ايه بابا متعلق بيا 
بس الحنية والحب والاهتمام مش كان باين غير لما بعدت وبقيت بروح زيارات كل كام شهر 
كل حد بيبعد للأبد بياخد جزء من روحنا، كل صحابي اللي مستحيل نتكلم تانى، كل اللي موتهم وجعني
كل الناس اللي سابت ندبات بالقلب بيظهر أثارها في دعوات بطهر الغيب في الصلاة 
في كلامي مع ربنا ودموع ملهاش نهاية بس بتريح جدا





قلوبنا زي الجوابات، ممكن من بره شكلها لطيف ومهتمين نبين قد ايه حلوة وراقية
لكن مفيش حد بيكون عارف ايه اللي جوه غير لما بيفتح الظرف ويبدأ يقرا اللي جوه فعلا
في ناس بتبني انطباع من البداية ومش بتهتم تقرا وتعرف بتأخد الجواب من العنوان حتى لو العنوان مكتوب غلط أو بصيغة مش مفهومة، وفي ناس بتبهرها العناوين الغامضة وفي ناس بتحب تقرا كل حاجة وبعدين تدى الانطباع المناسب 
مفيش مقاييس محددة للجمال.. للخير.. للحب .. لكن في قلوب بتعرف تحس كل المفاهيم دى في اي حاجة وكل حاجة 
القلوب الصافية... الرسائل الحلوة.. الدعوات الطيبة.. رزق من ربنا فلو فعلا ربنا بيحبك هتحس بيهم وهتشوفها وتلمسهم طول الوقت
حتى مع المواقف والأشخاص الغلط، روحك مش هتشوف غير الحلو وبس 
ويمكن ده المعني لـ "على نياتكم ترزقون..." 




لما بتنزل أغنية جديدة وتعجبني بفضل اسمعها كتير جدا، وبنسمعها في العربية أجباري كدا
لحد ما محمد زهق من إليسا الحمد لله، وحالياً بدأ يكره أنغام 😃
جدير بالذكر إن التدوينة دي أتكتبت على أغنيات ألبوم حالة خاصة جدا، 
علشان كدا سمتها بنفس أسم الألبوم نظراً لأني مش لاقية اسم مناسب 😂

0 التعليقات: