حالة خاصة جدا

صباح مناسب للبدايات الجديدة، للتخطيط والتدريب والمذاكرة

محتاجة أدون النهاردة علشان أفتكر أنه أول يوم فعلياً في التدريب على الشغل الجديد واللي في نفس الوقت مختلف ومهم 

من سنتين تقريبا كنت محددة هدف أني أكون واحدة من الفريق ده رغم ان الموضوع وقتها كان صعب 

قرار النقل تقريبا بقاله اكتر من 6 شهور وكل شهر يقولوا الشهر الجاي، 

النهاردة رسمياً بقيت واحدة من أفراد الفريق وقدرت أحقق هدف كبير بالنسبالي الحمد لله

الحمد لله حمداً كثيراً

بعد كام يوم هيكون أول عيد ميلاد لبابا وهو مش معانا، يمكن بابا من بعد جوازى وهو أتغير كتير في معاملته معايا

هو مش يمكن هو فعلا اتغير، دموعه يوم الفرح اللي خلت كل الناس تعيط 

مكالماته ليا وسؤاله المستمر هتيجي أمتى، اتصاله طول الطريق بقيتي فين.. وصلتي ولا لسه

وقت ما قلت خلاص هسافر علشان الولادة وانه يجي مخصوص ياخدني ونرجع في نفس الوقت حتى من غير ما يقعد دقيقة

ارتباطه بمريم وهي كمان كل التفاصيل اللي بتبيجي في بالي دايما، واستغرابي دايما ليه مش كان كدا طول الوقت

في ناس بيبان حبهم واهتمامهم اكتر لما بنبعد، يمكن انا بالذات كان باين من الاول قد ايه بابا متعلق بيا 

بس الحنية والحب والاهتمام مش كان باين غير لما بعدت وبقيت بروح زيارات كل كام شهر 

كل حد بيبعد للأبد بياخد جزء من روحنا، كل صحابي اللي مستحيل نتكلم تانى، كل اللي موتهم وجعني

كل الناس اللي سابت ندبات بالقلب بيظهر أثارها في دعوات بطهر الغيب في الصلاة 

في كلامي مع ربنا ودموع ملهاش نهاية بس بتريح جدا

قلوبنا زي الجوابات، ممكن من بره شكلها لطيف ومهتمين نبين قد ايه حلوة وراقية

لكن مفيش حد بيكون عارف ايه اللي جوه غير لما بيفتح الظرف ويبدأ يقرا اللي جوه فعلا

في ناس بتبني انطباع من البداية ومش بتهتم تقرا وتعرف بتأخد الجواب من العنوان حتى لو العنوان مكتوب غلط أو بصيغة مش مفهومة، وفي ناس بتبهرها العناوين الغامضة وفي ناس بتحب تقرا كل حاجة وبعدين تدى الانطباع المناسب 

مفيش مقاييس محددة للجمال.. للخير.. للحب .. لكن في قلوب بتعرف تحس كل المفاهيم دى في اي حاجة وكل حاجة 

القلوب الصافية... الرسائل الحلوة.. الدعوات الطيبة.. رزق من ربنا فلو فعلا ربنا بيحبك هتحس بيهم وهتشوفها وتلمسهم طول الوقت

حتى مع المواقف والأشخاص الغلط، روحك مش هتشوف غير الحلو وبس 

ويمكن ده المعني لـ "على نياتكم ترزقون..." 

لما بتنزل أغنية جديدة وتعجبني بفضل اسمعها كتير جدا، وبنسمعها في العربية أجباري كدا

لحد ما محمد زهق من إليسا الحمد لله، وحالياً بدأ يكره أنغام 😃

جدير بالذكر إن التدوينة دي أتكتبت على أغنيات ألبوم حالة خاصة جدا، 

علشان كدا سمتها بنفس أسم الألبوم نظراً لأني مش لاقية اسم مناسب 😂

تفاصيل

روحي عيني قلبي اللي بيحييني ايامي وسنيني انادي عليك بأيه

ليلي قمري الفرحه اللي في عمري الدم اللي بيجري في قلبي من سنين
طب اقول يا مفرحني، ولا اقولك يا جارحني معلش حبيبي سامحني، ناسيتني انا ابقى مين
بقالي كتير مش سمعت أغنية مبهجة بالشكل ده وصوت أنغام فيها فرحان اوى 

رغم اني مضايقة منها وبقالي كتير مش بسمع اي حاجة ليها، بس صالحتها بالاغنية دي 😍
بعد ما ركزت أكتر في الألبوم لقيت أن في أغاني كتير وجمل أكتر من رائعة،
أنغام حلوة وقوية وبرغم أي حاجة بقت مش عجباني فيها فأنا بحبها

كمية الحاجات الحلوة اللي حصلت في أخر أسبوعين مش معقوله ومش منطقية

كمية اللغبطة اللي في حياتي  كمان كتير أوى وطول الوقت بسأل نفسي.. ها وبعدين

كان لازم اروح الحسين واخد نفس قوى وعميق علشان أقدر أركز اصلي وادعي وافصل عن الدنيا

محمد بيقول اني بتغير بعد ما بخرج من المسجد بكون هادية ومرتاحة

وده حقيقي جدا المكان ده فيه حاجة غريبة بحس انى بفضي كل الطاقة السلبية بشحن من جديد

روحي متعلقة بالمكان بشكل غريب وبحس حنين لو طولت شوية مش رحت 

في غلطات ممكن نعديها وفي تصرفات ممكن تحصل غصب عننا وتعدي بردو

وفي وعود لو مش التزمنا بيها ممكن نتجاوز عنها، لكن في غلطات بسيطة بتفرق وبتوجع

في تصرفات تبان تافهة لكن وقعها مرعب، وفي وعد يبان سهل لكن فعلياً بيكسر القلب. 

ومش ممكن يكون في مبرر ولا بيكون مسموح اصلا نسمع مبررأو شرح

علشان صوت الوجع بيكون أعلى من أي صوت وأقوي من اي سبب أو ظروف
هنحاول نكون أقوى بعد كل صدمة أو غلطة ونعديها أو نركز على إزاي نعديها وأحنا محافظين على إتزانا الداخلى
الحياة صدمات كتير لكن الاقوى هي اللي بنكون مجبرين على الاختيار
كل محنة بعديها بكون محتاجة بعدها اصلي ركعتين شكر لله أنه خلاني قوية أقدر أتحمل وأتجاوز وأكمل
يا الله كم جميلة عطاياك، وكم رائعة حكمتك، وكم قريب منى مجيب لدعائي لطيف بقلبي

أنتِ أنتِ و لا شيء آخر : جميلة كالبداية. تذهبين إلي حيث تحبين، فقط . تخلصين لذاتك، لا لكي تدهشي الآخرين! 

تؤدين أمورك برغبة حقيقة، لا رغبة عن هزيمة.. ولا رغبة في انتصار !

السلام ينام فوق طرف ثوبك، تضحكين، كغيمة من براءة، تغنين، لروحك .. لأجنحتك .. وأحلامك!

لا تُضيّعين أيا مما في قلبك، و لن تكوني أبدًا فراشة فضت الريح جناحيها ! ⁦🦋💙

جابر طاحون

‏اللهمّ طاقه، طاقة بها نعيش، ونتحمّل، ونرضي، ونَتأقلَم ونتقبّل، ونهوّن،
ونتجَاهل، ونفوّت، ونغامِر، ونجازِف، ونصبِر ونصبِر ونصبِر....