واهي ذكريات

في وسط ما احنا مشغولين جدا مهمومين جدا او فرحانين جدا 

حالة الـ جدا دي بتخليك ترجع لذكرياتك بشكل تلقائي 

بنستدعي اشخاص من الماضي كانوا بيسندونا لما بنكون خلاص هنقع 

او بنستدعي ابتسامتهم في وقت ما كانوا بيحاولوا يسعدونا 

او كلام كتير اوووى كان بينا في مواقف مشابهة او حالة من الـ جدا مرت وهما موجودين 

المواقف والاشخاص اللى فاتوا وبنعتقد ان خلاص انتهوا 

مش بيكونوا انتهوا خالص بالعكس يمكن هما بس اللى يكونوا معاك بعد كدا 

حاولوا تسيبوا جوه الاشخاص اللى بتقابلوهم فى حياتك مواقف حلوة ومؤثرة 

حاولوا تسيبوا اثر طيب فى ذكريات اللى حواليكم 

احنا اصلا كوكتيل ذكريات 

..........................................

من الذكريات اللى دايما بفتكرها الفترة دى جملة صديق 

" بعد 10 سنين هتقابلى كل الاشخاص اللى مرت فى حياتك وهتلاقى كل حاجة فيهم اتغيرت

وقتها افتكرينى وافتكرى ان كل الناس هتتغير للأسوء وهتقولى الحمد لله انك لسه زى ما انتى"

فعلا بقابل ناس من اللى مرت فى حياتى ومش كنت اعرف عنهم حاجة من سنين كتير 

او مش شفتهم من فترة طويلة جدا يمكن عدى 5 سنين تقريبا وفعلا كل الناس اتغيرت 

اتغيروا فى الشكل على الاقل علامات الزمن بانت عليهم كبروا يجي 20 سنة في الخمس سنين دول 

ده خلاني اسال كل حد اقابله هو انا شكلى اتغير طيب بقيت احلى ولا اوحش 

طيب اتغيرت فى صفاتي طيب للاحسن ولا للاسوء 

طيب هو بعد الـ 10 سنين ايه ممكن يكون اتغير اكتر من كدا ايه اللى ممكن يحصل 

الحمد لله انى لسه زى ما انا :)

........................................

وايه احلى من صاحبتى اللى بتفهمنى اكتر من نفسي واللى لما بحكيلها بلاقيها بتفسر كل حاجه 

وكأنها عايشة جوه روحي حاسة بالكلام اللى مش بقوله وبالأفكار اللى بتيجي فى بالى 

واكتر من كل ده بتشجعنى على الخطوات المهمة فى حياتى 

وبتقوينى بجملة بحاول دايما اصدقها انتى اقوى بنت شفتها فى حياتى 

وبتفرحنى بجملة انا عمرى ما لقيت حد كدا 

رغم انها مش هتقرا الكلام ده الا انى بقولها هو انتى ازاى كدا بجد ازاى علاقتنا بالقوة دى 

مع انى مش شفتك من اخر يوم فى التمهيدي وكان ممكن تبقى علاقتنا ببعض ذكرى 

زى كل البنات اللي اتعرفنا على بعض وقتها إلا أننا كنا استثناء وبقيتي اقرب صاحبة ليا 

..........................................

طنطا من المدن اللى مرتبطة معايا بالذكريات لاني مش بحب البلد دى 

لكن تقريبا جزء كبير من ذكرياتى مرتبط بيها لما بكون مسافرة واعدى عليها

بحس ان شريط من الذكريات بيعدي قدامي الجامعة واصحابى وهبة والعياط والضحك 

والاسكريبت الملون والقلم الأسود ومحطة القطر واستديوهات الاذاعة 

واللى تقريبا زيارتى ليها في حد ذاتها بقت ذكرى مش هتتكرر تانى 

........................................

اوقات بيكون نفسى اعرف الاشخاص اللى انا مريت فى حياتهم بيفتكروني ازاى 

وبيفتكرولى ايه موقف او كلمة او حتى ابتسامة او دموع 

هل ممكن اكون عملت فى حد حاجة وبيفتكرنى بشكل مش حلو 

دايما بتمنى ان اسيب فى قلوب اللى اقابلهم أثر طيب

وفي اعتقادي ان ذكرياتى عن الاشخاص والاماكن هي انعكاس لذكرياتهم عنى 

وياريت يبقى كدا فعلا :)