Thursday, May 27, 2010

تناقضات



يا حبيبتي ليه مستغربه لما بقول اني حزين جدا سعيد !!!
ماحنا بنطلع نبكي علي الأموت في عز محنا فرحنين بالعيد !


والبرتقال حادق اوي مسكر ..
والبحر رايق بس متعكر ..
والدنيا ممكن تبقي حر وبرد ..
و الدم لونه زي لون الورد ..
وحلمنا قريب اوي وبعيد



حاجات كتير جوايا عكس بعضها
هو انا عاقلة ولا مستسلمة 
اوقات بكون مبسوطة بس حزينة
انا عارفة انا عايزة ايه بس بردو مش عارفة عايزة اوصل لايه
ايمكن اكون بضغط على نفسى وليه مش اكون متهاونة

يمكن بدرس علشان اهرب من الواقع اللى انا عيشاه
بس انا عايزة اوصل لحاجة من المذاكرة دى
هو انا بضحك على نفسى ولا بضحك على اللى حواليا !!مش عارفة

مش عايزة اتجوز بس طبعا نفسى اتجوز
طيب انا صحيح برفض عرسان كتير بس انا مش رفضت حد
يمكن مش قولتها صريحة بس بيبان يعنى انى مش عايزة
بس هما اصلا بياخدوا برايئ
اى كان فانا اساسا مش عايزة وحتى لو عايزة فمش دلوقتى خالص
مع انى نفسى دلوقتى جدا

عايزة اشتغل طيب امال انا بعمل ايه دلوقتى
لا ما انا مش عاجبنى الشغل ده نفسى اشتغل فى مجالى
وهو انا اصلا اصلح فى مجالى
بيقولوا انى اصلح بس انا مش بقى عندى طموح اوصل مع انى بحاول اوصل

الكلام ده بيدل انى مجنونه جدا ومش متزنة فى تفكيرى
بس الواضح لكل الناس انى عاقلة جدا وبحسب كل خطواتى
مع انى مؤمنة جدا ان حتى لو خطواتى حاليا صح
فانا مش هوصل لحاجة فى الاخر
لان بمنتهى السهولة اللى عايز كل حاجة مش بيوصل لاى حاجة
بس اللى بيحاول بردو بيوصل

بين الامل والياس دايما فى منطقة تناقض
ليس بيضاء وليست سوداء ولكنها غير محددة المعالم
ينتهى الصراع بداخلها الى الوصول الى اى من الخيارين

الصورة مش ليها اى علاقة بالموضوع
حطتها لمجرد انى بحبها !!!

اللى بالبينك اغنية حزين جدا سعيد
لـ على حسين 

2 التعليقات:

Bent Men ElZaman Da !! said...

على فكره الحاله دى طبيعيه يا يويو
مش غريبه ولا انتى تبقى كده مجنونه
بالعكس ده تفكير طبيعى لانك دلوقتى فى مرحله بتحدد مصيرك
سواء فى شغل او فى دراسه او فى جواز
زى ما بتقولى عايزه كل حاجه
بس فى نفس الوقت عايزه كل حاجه على مزاجك ومش تخسرى اى حاجه
وده صعب
بيبقى الحل الوحيد هنا
انك تركزى فى طموحك اللى قريب منك
وهتوصليله اكتر
سيبى حاجه متأجله ادام بعيده ومش عارفه تحددى مصيرها
وربنا معاكى يا يويو وان شاء الله تحققى كل اللى بتحلمى بيه

pepsi said...

مهو المشكلة لما يتقدملك عروض كويس
وترفضى لمجرد انك مش عايزة وخلاص
ممكن بعد شوية تحسى انك غلطتى لما رفضتى
بس الحمد لله على كل حال
ومش بندم على اى فرصه حتى لو اكتشفت بعد كدا انها كانت حلوة
وربنا يوفقنا كلنا يارب