Tuesday, January 19, 2010

من ذاكرتى


حسيت كدا ان فى حاجات عايزه اكتبها تحت اى مسمى بقى
هكتب اللى يجى فى بالى وخلاص
هى: مش بقيتى بتكتبى فصحه ليه ؟
انا : تغيير يمكن بتمرد على نفسى
هو انا كده وحشه ؟
هى : لا بس مش انتى
!

************************
صديقتى : آية بطلتى تكتبى شعر ليه ؟
انا : معرفش بس مش حابه اكتب
صديقتى : وحشنى كلامك حتى عبرى عنى
انا : طول عمرك ملهمتى بس مش حاسه حاجه علشان اكتبها
تقدرى تقولى اعتزلت لعدم كفاية الموهبة
!!!

************************
هى : احمد ماهر دخل الجيش 
انا : بتتكلمى جد 
هى : دى اخرت اللى يجى عليكى هههههه
انا : يا حرام والله صعب عليا 
هى : يا سلام انتى اللى بتقولى كدا
انا : والله مش كنت بكرهه بالعكس كنت بحب رخامته جدا
هى : ما انا عارفه وهو كمان كان بيحب يرخم عليكى بس 
انا : يلا يستاهل خليه يتربى
!!!!!!!

****************************
هى : مش هترجعى المنتدى تانى ؟
انا : لا خلاص 
هى : انتى عمر ما حد هزمك 
انا : ولا عمر حد هيهزمنى 
هى : امال مش راجعه ليه؟
انا : علشان ده اكتر مكان حبيته وكفايا كدا
!!!!

*********************************
انا : تفتكرى هيجى يوم افرح فيه 
صديقتى : ايه يا بنتى الكلام ده انتى اللى كنتى بتشجعينى وبتخلينى اتفائل 
انا : كان عرض محدود حتى نفاذ الكميه هههههه
!!!!

****************************
هو : فاكرة ........
انا : اه طبعا 
هو : انتى مبتنسيش حاجه ابدا حتى لو صغيرة 
انا : الله اكبر من عنيك كفايا انى بفكرك باللى بتنساه
هو : انتى دنيتى 
ملحوظه : للاسف نسيت اللى كنت بتفكرنى بيه
!!!!!

*******************************
هى : العشرة مبتهونش واحنا اصحاب من زمان 
انا : طبعا وكلام كتير بعدها 
هى : انا نسيت اصلا كان ايه اللى حصل 
انا : وانا مش عارفه اصلا كان ايه اللى حصل 
ملحوظه اخرى : لكن كلا منا يعرف الان ماذا حدث بعد ذلك وهانت العشرة
!!!!

********************************
هو : انتى مفيش زيك فى الدنيا 
انا : يا سلام مش للدرجه دى 
هو : طيب انتى شفتى حد زيك كدا 
انا : لا بس اكيد فى زيى كتير 
هو : طول ما انتى مشفتيش يبقى مفيش
!!!!

*******************************
انا : كتبتلك حاجه صغيرة كدا 
صديقتى : شعر 
انا : اه 
صديقتى : هترجعى تكتبى 
انا : لا دى استثناء 
صديقتى : طيب قولى 
انا : 
أيا رجلا اجتاحنى دون اذن منى 
وتركنى بقرارى 
جننت يوم احببته
وشفيت بهواه
لكن روحى فارقتنى برحيله
فغذوت ارثى حالتى بلسانى
!!!

**************************
 اشكرك لانك كنت الاجمل فى زمن القبح
والاقرب رغم كل ذلك البعد
والاحن رغما عن قسوتى
والاوحد وان امتلات الارض امامى 
اشكرك لانك كنت لى 

*****************************
بحب الشتاء يمكن علشان شايل رحتك
وبحب النيل جايز لانه بيعكس صورتك
وبردو بحب فيروز لان كلامها بيشبهك
!!!
الاكيد انى بحب مصر علشان جزء منك

********************************
قولوا عيونه مش فجاه بينتسوا 
وضحكات عيونه ثابتين ما بينقصوا 
ما ادرى شو بو وبعرف شو بو 
مطبوعه بذاكرته ما تبحثوا!!!!
فيروز ...سلملى عليه

2 التعليقات:

ShoOoShy said...

المهم يا يويو إنك تكتبي
مش مهم بقى يكون شعر ولا يكون ايه
المهم تقولي اللي جواكي باي طريقه
استمري بقى ;)

pepsi said...

مستمرة اهو مع ان بقت حاجه صعبه ان الواحد يعبر اصلا عن اللى جواه
نورتينى يا شوشو ابقى تعالى تانى