ويبقي الأثر...

نوفمبر شهر الحبايب 

أخر مرة شفت أحمد وأخر مرة يكون واعي وعارف اللي حواليه 

يارب تكون مبسوط في مكانك وواصلك دعانا وكل حاجة بنعملها ليك 

مفيش تدوين ولا معرض كتاب من بعدك يا خالو الحب اللي في قلوبنا ليك أكيد واصلك صح

فاكر لما قولتلى جبر الخواطر دى نعمة ربنا مش بيديها لكل الناس 

إن شاء الله في ميزان حسناتك جبرك لكل القلوب اللي قابلتك وعرفتك
اكتر أب قابلته سند بجد كل سنه وانت طيب ودايما كل حبايبك حواليك ويزيدوا في بيتك كل سنة 

كل سنة وانتي طيبة يا ماما ربنا يخليكي لينا ويقدرنا نعوضك ونفرحك  

كل لحظة يا مريم وانا سامعة نبضك بقلبي بعمر تانى بفرحة تانية مختلفة ربنا يحفظك ويبارك فيكي يارب

السنه خلاص قربت تخلص والمفاجاة بالنسبالي ان النوت فاضية

اهداف حققتها مش مكتوب قدامها تفاصيل بس علامات أنها انتهت 

قائمة السفر لسه فيها بلاد كتير نفسي أروحها وبلاد أكتر ضفتها 

صراعات كتير دخلت فيها ونجاحات حققتها، وفقد بيلازمى طول الوقت

سنة أخدت من روحي كتير وقوتني أكتر بكتير 

ممتنة لنفسي إني لسه محافظة على التفاصيل الحلوة اللي جوايا

الكلمة الحلوة والتفاصيل البسيطة اللي بعد ما المواقف بتعدي والسنين بتمر بتفضل هي الثابت الوحيد

الأثر الطيب للحلوين اللي بنقابلهم في حياتنا وبنتوه من بعض بعد كدا

لما بفتكر موقف وابتسم لما بفتكر جملة لشخص ما او كلمة حد قالها وفرحتنى تلقائياً بدعي للشخص ده ربنا يسعده 

ودايما بتمنى أكون سبت أثر طيب في قلب أي حد علشان لما يفتكرني يدعيلي 

كل حاجة في الدنيا بتروح، أحنا نفسنا في يوم هنروح مش نسيب غير ذكرى، أثر,, ويارب يكون جميل

الفترة الاخيرة بفكر في اصحابي كتير اوي بطريقة غريبة يمكن طول السنين اللي فاتت بيكونوا في بالي اه

لكن مش باخد اي خطوة اني اكلم حد او اقابل حد، فجاة حسيت ان العمر مش مضمون ومش فاضل كتير 

علشان نفضل نأجل، عايزة اشوف كل صحابي وكل الناس اللي وحشوني 

قابلت ناس كتير الفترة اللي فاتت وطلبت اشوف ناس بالاسم واتفاجئت بالسعادة اللي لقيتها في عيونهم وقتها

حسيت فجاة هو انا كنت فين وكل الناس دى بتتغير وبتكبر ازاى العمر بيعدي كدا وانا مش موجودة

واكيد زي ما المقابلات دي سابت جواهم تأثير إيجابي فهي سابت جوايا تأثير إيجابي أكبر..

 بتفائل وبهجة كدا نبدأ تخطيط وأهداف جديدة وأحلام جديدة 

ونستنى ديمسبر حيث تبدأ الأحلام 💖

وبعض من راحة

أكتوبر خلص، أكتوبر السنة دي مميز وملياااان أحداث بشكل مبهر

كل يوم حالة مختلفة، كل يوم مشاعر مختلفة، كل يوم وليه حالة خاصة مش بتتكرر تانى

أيام وصلت فيها لشعور السعادة الكاملة الاحساس بالراحة والسلام النفسي 

احساس ان الحياة لسه فيها حاجات كتير حلوة حاجات كتير لسه مش عشتها او مش شفتها

شعور الراحة المطلق وكأني طايرة وسعيدة 

مذهل أن يشعر المرء بجرأة

عندما يكون متأكداً أنه محبوب

فرويد 1882

البوست ده عن الأشياء المريحة، فمش هكتب عن أي حاجة وحشة حصلت في الشهر ده، 

أو مواقف سلبية عليا أو تأثيرها وجعني، عايزة تفضل كل ذكرياتي عن أكتوبر 2019 أنه كما يجب أن يكون

أنه مريح وسعيد ومبهج ومنطقي 

من الأشياء المريحة قعدتنا عند رنا والفضفضة والنسكافية والبلكونه

الطريق لزايد والجو الرائع وكل التفاصيل المتعلقة باليوم، التجارب المميزة والسعادة والفستان الجديد

والمشي في الشارع الصبح والدنيا رايقة، كل حاجة كانت حلوة بشكل فوق الوصف 

كل حاجة بردو في وسط البلد كانت حلوة فوق الوصف، يمكن هو استعدادي النفسي للسعادة 

يمكن فعلا تفاصيل الايام اللي خرجت فيها كانت فارقة معايا أوي 

حتى البلاي ليست في الكافية كان رهيب مع القهوة العظيمة، كل حاجة كانت مريحة وهادية 

الجو بدأ يكون برد شوية واحساس البرد ممتع بالنسبالي بيديني احساس بالسعادة

اللبس الشتوي والنسكافية الصبح والشغل بدرى احساس الامتنان للبدايات وكل الحاجات البسيطة 

يمكن بحب المطر بزيادة وصوت فيروز والقهوة بليل وبحب احس بالدفا والراحة في ليالي الشتاء 

فبكون مبسوطة بسبتمبر ومستنيه أحلي شهور في السنه واللي مجرد اسمائهم بيديني شعور مضاعف بالراحة

بحب الـ gif جدااا ومش بزهق ابدا وانا بتفرج عليهم وافضل اعيد في حاجة عجبتني منهم أكتر من مرة. 

في حاجات بحسها مريحة جدا مجرد اني اشوفها، او بتخليني مبسوطة بطريقة أو بأخرى. 

وده تحول من الصور الثابته للمتحركة، تحول في مشاعري ورغبة في التعبير أكتر، تحول في نظرتي للأمور ممكن

الحياة محتاجة نعيشها بروح كاملة، مش مجرد لقطات تبين سعادة ممكن تكون مش حقيقية بس هي اللقطة جت كدا

اللهم إني أحاول وأحاول .. .اللهم طريق أو علامة... اللهم بشرى لـ راحة لـ سلام