Monday, July 30, 2012

مع نفسى أتحدث



- مشكلتك إنك حساسة بزيادة اوى
- او ممكن ان - الأنا - عندى عالية شويتين
- اه فعلا
" يمكن دى مشكلتى الاساسية ان بتعب جدا من إحساس ان حد بيجى عليا
او لمجرد فكرة انى ضعيفة ومحتاجة حاجة من حد حتى لو الحاجة دى سؤال "

- هو ليه محدش من صحابك قالك ؟
- دقيقتين تفكير وبعدين قلت عادى بقى
" وجعنى السؤال اوى يمكن علشان فكرنى ان ماليش صحاب يهتموا اوى لدرجة يقولولى
او يمكن علشان نفسى يبقى عندى "

- انتى عندك صحاب كتير بيحبوكى بس انتى اللى حساسة بزيادة
- طيب احنا هنجرب حاجة علشان تصدق انا هغير رقم موبايلى ومش هقول لحد
واما نشوف مين هيفكر يتصل بيا ويقلق ويسأل عليا
" اساسا ده مش مقياس انا اللى بتلكك علشان اغير رقمى لان اصلا كل صحابى
اللى معاهم رقمى وبيتصلوا بيا 3 بس بردو لو مش اتصلت انا ممكن يفكروا يتصلوا اعتقد لا "

وانا عماله افتكر كل الحوارات دى واحساسى اللى هو بين الاقواس ده
وزعلانة فعلا مع ان انا اللى عاملة حدود اساسا ومش عندى علاقات كتير
مش بفتح اى إيميل ولا بضيف حد على الفيس من البنات الا بحساب ومش بضيف ولاد إطلاقا
مش بدى رقمى لحد مع ان لو اى بنت أعرفها طلبت الرقم بديلها وان كان ده محصلش غير مرتين
ومش بحب اطلب من واحدة اضافة او رقم خجولة بزيادة ممكن بخاف من رد فعل بضايقنى احتمال
وكل الولاد اللى بكلمهم اوقات من بلوجر 2 اللى ممكن أسالهم او أخد رايهم فى حاجة
و إحقاقا للحق الولاد أحسن بكتير من البنات فى الحاجات اللى فيها شغل مفيش عندهم مجاملة
وبيعملوا كل اللى يقدروا عليه لو طلبت منهم حاجة ده طبعا بالحكم على اللى اتعاملت معاهم

وانا مع نفسى وعماله أفكر كدا جاتلى رسالة على الفيس
من بنوته كان حصل موقف بنا من فترة طويلة جدا وهى لسه فاكرة تفاصيله
وبعته تحققلى حلم من الاحلام اللى كنت فاكرة مستحيل يتحقق
وإذا بعنيا تدمع وأحس قلبى بيتنطط من الفرحة
هو فى كدا بجد هى الناس دى لسه مش خلصت من الدنيا
يعنى انا مش كنت ببالغ لو كتبت زمان ان فى ناس بيفكروا فيك وفاكرينك حتى لو مش ليك علاقة بيهم
حسيت انها رسالة من ربنا بتطبط عليا وتقولى متزعليش فى ناس تانية فكراكى

واتبدل الاحساس وبقيت فرحانة اوى الحمد لله
ربنا يسعدها ويفرح قلبها على قد السعادة اللى حاسة بيها وأكتر يارب


Saturday, July 28, 2012

استفتاءات فيسبوكية



موضوع الاستفتاءات اللى على الفيس بوك ده وصل لقمة الاستفزاز بصراحة
ما رأيك فى سياسة بشار الاسد ؟
مع - ضد
وتلاقى مع واخده النسبة الاعلى
ما هى ديانتك ؟
الاسلام - المسيحية - اليهودية - غير ذلك
لما يبقى فى 410 حد عامل غير ذلك منهم واحدة اعرفها يبقى ده اسمه ايه
وحاجات من كدا كتيرررر بس يمكن دول اكتر اتنين استفزونى جدا
 نفسى حد يعرفنى مين صاحب الاسئلة العظيمة اللى بيحصل عليها الاستفتاءات دى
وايه كمية البشر اللى بتجاوب دى بردو
مهو لما يبقى السؤال مستفز يبقى الناس اللى بتجاوب دى ............
النقط اللى فوق دى وصف حطه انت زى ما تحب مش هنختلف
بصرف النظر ان فى اسئلة مش فاهمين ايه الهدف منها
زى مثلا مين اكتر مرشح للرئاسة لازلت تحترمه ؟
ففى بقى اسئلة للترفيه على شاكلة
بتحب الايس كريم اكترولا البيبسى طيب بالنسبة للشيكولاته جلاكسى ولا كادبورى
طيب اكتر حاجة بتستخدمها الموبايل ولا الكمبيوتر ولا الاب على اساس ان الكمبيوتر
والاب توب مش نفس الاستخدام يعنى عادى بلاش تدققوا فى الحاجات دى
اما بقى بالنسبة للاسئلة الوطنية فالسؤال الاساسى بلدك ايه ؟
وتلاقى الاجابات مصرى وافتخر سعودى وافتخر وكله وافتخر
 وطبعا العرب كلهم دائما وابدا بيفتخروا بس بايه بالظبط هما نفسهم مش عارفين
اما بقى الاستفتاء اللى فرحنى شخصيا هو انت منين فى مصر ؟
وكل المحافظات مكتوبة عادى الا كفرالشيخ جنبها قلب وده طبعا معناه ان اللى كاتب السؤال كفراوى
فطبعا جاوبت علشان القلب هههههههههه وبينى وبينكم يعنى انا بفرح جدا باى حد بلدياتى فلازم اشجعه
بس فى المجمل انا بتستفزنى جدا الاسئلة الرهيبة دى وخصوصا فى المواقف التى لا تحتمل
اللى مش ليها غير اجابة وحدة المفروض وتلاقى مليون اختيار وناس غريبة
بترد اجابات اغرب بتستفزك اكتر
عارفة انه بوست مستفز بس مش مشكلة بقى واسيبكم مع اخر استفتاء
ايه اكتر الايام اللى بتحبها فى رمضان
ليلة الرؤية  - ليلة القدر - ليلة العيد

Saturday, July 21, 2012

رمضانكم أحلى



رمضان دايما بيجمعنا على الخير والذكر و الاخلاق 
يمكن وسط مشاغل الدنيا مش بنكون ملتزمين اوى 
لكن فى رمضان الوضع بيختلف كلنا بنتسابق لكل حاجة حلوة 
عايزين ربنا يكرمنا ويغفرلنا و يسامحنا عايزين نقرب لربنا اكتر 
رمضان دايما فيه حاجات كتير اوى حلوة 
يمكن احلى حاجة فى رمضان السنة دى - انتوا - من غير اسماء كدا
كلكم محليين رمضان السنة دى فرحانة ان دعايا هيزيد ناس كتير 
فرحانة بوجودكم فى حياتى وسؤالكم عليا و رسايل الفيس اللى جتلى 
اسفة انى اتاخرت عليكم بس كنت مشغولة جدا والله ومش كنت بقدر ادخل نت 
كل رمضان وانتوا منورين حياتى و مزودين دعايا و مجتمعين على الخير يارب 

يعنى ايه رمضان لو جيت كشفت عنها فى المعجم يبقى هتكشف عنها فى مادة " رمض "
اللى هى معناها الحدة فى الاشياء ورمضان مأخوذة من الرمضاء اللى هى شدة الحر 
الاساس فى رمضان شدة الحر تفتكروا الحر دلوقتى اهون ولا الحر زمان فى الصحراء 
ومفيش تكييف ولا مروحة ولا اى وسائل راحة وترفيه 
ولما نينا عليه افضل الصلاة والسلام يقولنا " من قام رمضان إيمانا واحتسابا غفر له 
ما تقدم من ذنبه " مش يبقى يستاهل اننا نستحمل و نحاول نستغله على قد ما نقدر 
بس من غير ما نفضل نشتكى ونقول بس والله الجو حر اوى مش عارفين نعمل ايه 
وحشة اوى فى حقنا ان ربنا يدينا فرصة زى دى ونكون من جوانا مش راضيين بقضائه 
فى ان الجو يكون حر حاولوا ترضوا وتبتهجوا وكل ما يزيد الحر اجتتهدوا اكتر 
والتمسوا من الله ثواب مضاعف 

انا دايما بحسب السنين برمضان يعنى من رمضان لرمضان سنة لرمضان وكدا يعنى 
لو حسبتوها كدا هتحسوا ان السنين بتزيد بس انا بحب احسب سنين عمرى كدا
يمكن علشان انا اتولدت فى رجب مش عارفة بس اعتقد ان دى حاجة حلوة جدا
لان رمضان الشهر الوحيد اللى حتى لو حصلك فيه حاجة وحشة فاكيد اكيد فيه مليون حاجة حلوة 

وفى بداية رمضان احب افكر نفسى ان اسوء رمضان فى حياتى هو رمضان 2010
كنت مقصرة لابعد الحدود للاسف واحلى رمضان هو رمضان 2011 معنى كدا ان 
لازم احافظ على اللى عملته السنة اللى فاتت واقرب اكتر واكتر 
ادعولى ربنا يثبتنى ويثبتكم ويقوينا جميعا يارب 

" دعاء بظهر الغيب يكفينى "
استاتيس كتير بكتبها على الفيس وكنت كتبتها فى اكتر من بوست طول السنة اللى فاتت 
جالى عليها اكتر من رسالة على الفيس فى اوقات مختلفة 
ناس سالونى تحبى ندعيلك بايه وناس تانيين قالولى دعينالك واخر واحدة بعتت تقولى 

انها عيزانى انا كمان ادعيلها وان هى بقت بتكتب الجملة دى فى الفيس بتاعها 
غالبية اللى بعتولى مش اعرفهم ومش ضيفاهم اساسا فده فرحنى جدا 
ياريت تدعوا لكل الناس اللى تعرفوهم واللى مش تعرفوهم يمكن حد تدعيله 
ويكون هو فى اشد الحاجة لدعائك وربنا يتقبل منك وكمان الملائكة هترد عليك ولك بالمثل
وعلشان احنا فى رمضان شهر الدعاء والاستجابة 
فدعاء بظهر الغيب يكفينا جميعا



Wednesday, July 18, 2012

من مذكرات طفلة فى العشرين 2




انه الثلاثاء وأشعر دوما ان الثلاثاء يحبنى كثيرا 
لذا من بين أيام الاسبوع الاخرى أنتظره وأبتهج لقدومه 
لا أذكر سببا على الاطلاق وكلما لاحظ أحد زملائى فى العمل حبى له 
يتطلع الى جدول حصصى فيجد ان الثلاثاء دوما مكتظ 
فتتحول أعينهم إلى فى نظرة غيظ :))

------------------------

يغار من الكتابة هكذا قلت لوالدته فبدا عليها الاستغراب 
وقالت " استغلى جميع  الفرص حتى وان كانت غضبه
فى المزيد من الابداع وانا أثق فى قدراتك "
فألزمنى الاستغراب الصمت 

--------------------------

عارف رمضان اللى فات كانت اول سنة اصلى قيام الليل طول الشهر
ولما كنت بضعف انت كنت بتقوينى علشان كدا كنت بعد الفجر بصلى قضاء حاجة 
وادعى ربنا تفضل جنبى طول العمر وتقوينى اكتر واكتر
ولما ربنا كتبك ليا نويت ان كل سنة ازود فى العبادات واقرب لربنا اكتر وانت معايا 

-----------------------------

- ايوة انا عايزة اتجوز يوم الثلاثاء 
- اشمعنا الثلاثاء يعنى الناس بتتجوز الخميس او الجمعة او حسب حجز القاعة 
- مش ليا دعوة بقى عايزة ثلاثاء انا 
- ادينى سبب مقنع طيب 
- بحبه 
- وده اكتر سبب مقنع مش يخلينى اعمله ثلاثاء 

-------------------------------

ينفع لما تزعل منى تطبطب عليا 
انت بتضايق وتزعل وانا اللى بيفضل واجعنى زعلك 

--------------------------------

هل تزهد عيناك النوم لغصة بقلبك منى ؟
كثيرا ما يردد قلبى السؤال مع تقبيلك وجنتى صباحا بعد شجار 
مرددا بانك تحبنى أكثر مما أحبك 

----------------------------------

احلى حاجة فى بتنا انه شكلنا اوى وانت واخدنى على قد عقلى 
وسايبنى اعمل فى الحيطان اللى انا عيزاه 
والزق حاجات بتنور فى الضلمة تفتكر ولادنا هيخافوا منها 
المشكلة اللى بجد بقى ان انا اللى اخاف منها 
وقتها لو قولتلك تغير لون الشقة هتعمل فيا ايه ؟

------------------------------------

- أحلى عروسة لعبة لأحلى عروسة بجد
- أحلى جملة سمعتها ايه ده طلعت رومانسى :$
- لا وايه العروسة بتمشى وبتقول وحوى يا وحوى
- ههههههههههههههه على اساس انى طفلة يعنى
- لا خالص هو انا قلت حاجة
- طيب استنى اروح افرجها لماما

-------------------------------------

 فى حضرتك تفقد الاشياء تماسكها وتنجذب إليكِ حتى أنا 
قالها منذ لحظة ضعفه الاولى وألزمنى عهدا بأن أكون له أقرب من هو لذاته 

-----------------------------------------

Monday, July 16, 2012

وإنى أرغى





نظرا لأنى قررت أرغى فى البوست ده 
فياريت اللى مش عايز يوجع دماغه ممكن يرجع للبوست اللى قبل كدا
قصة حلوة مش مملة يعنى بس محدش يدخل ويخرج من غير رايه 
سيب رأيك فى اى مكان المهم تسيب دليل وجودك :)

رمضان الاسبوع الجاى كل سنة وانتوا طيبين 
والصراحة رمضان السنة دى كريم اوى معانا عامل الواجب وزيادة من قبل ما يجى 
أطول رمضان من 33 سنة علشان ميبقاش حارمكم من حاجة يعنى 
وكمان فى الحر الفظيع اعتقد مش هتلاقوا حر اكتر من كدا 
ناقص بقى ان كلنا نزود فى العبادات علشان يبقى كرم فى كل حاجة 
ربنا يقوينا على القيام والذكر وحسن العبادة يارب 

رمضان السنة اللى فاتت كان الحمد لله كريم معايا من اول يوم
وكان اكتر رمضان انجز فيه حاجات كتير جدا
الحمد لله ربنا يتقبل
و يكون رمضان السنة دى فرصة اكبر انى اثبت واكمل على اللى بداته السنة اللى فاتت
يمكن اللى مضايقنى السنة دى ان الفجر بيأذن الساعة 3 وتلت يعنى نبدأ قيام الليل من امتى مش عارفة 
مع مراعاة ان البنات غير الولاد فى غسل اطباق بعد الفطار و تجهيز سحور وارتباطات اخرى 
انما الولاد بقى مفيش اى مشكلة وبحس ان الرجالة فى رمضان بيفتروا اكتر 
مش بيقدروا ان احنا كمان من حقنا نلاقى وقت للعبادة زيهم مهو احنا كمان هنحاسب بس نقول ايه بقى 
عموما يارب رمضان يكون كريم معاكم فى الخير والأجر ان شاء الله 

فرحانة اوى  بمعرض فيصل الرمضانى ليه بقى علشان كتابى هيكون موجود بإذن الله 
كمان كتاب أبجدية إبداع عفوى وانا الابجدية بالنسبالى فرحتى الاولى فليه معزة خاصة 
كمان علشان كتاب جماعى ففرحتى بيه اكبر 
ولما كمان يكون فى اصدار تانى من كتاب ال 100 تدوينة فكدا يبقى انا فى قمة السعادة 
عايزين تعرفوا اكتر وتشاركونا حلمنا فى الاصدار التانى تعالوا هنا 
بالنسبة بقى للقاهريين اللى يعرفونى واللى مش يعرفونى وعادوا هنا بالصدفة 
فى معرض فيصل اللى فى أرض الهيئة العامة للكتاب بمحطة الطالبية من يوم 

26 يوليو ولـ 10 أغسطس هتلاقوا كتاب اسمه " حالات مفردة " لـ آية محمد حماد 
اللى هى تقريبا تبقى انا ياريت تشتروه علشان تطمنونى حلو ولا وحش ولا ظروفه ايه 
وده طبعا لانى مش هعرف اشوفه وتسلمولى عليه كدا لحد ما ربنا يسهل واشوفه بقى 
وياريت لو تروحوا على شهر 8 كدا لانه لسه مش دخل الطبع اساسا 
بس قلت اعرفكم بردو علشان تعملوا حسابك فى 15 جنية تمن الكتاب قبل رمضان 
انا عارفة الناس كلها بتفلس فى رمضان فمن قبلها اهو اعملوا حسابكم بقى 

فى حاجة مزعلانى من ناس كتير على بلوجر والفيس الا وهى الهمزة 
يا جماعة انا اسمى " آية " همزة مد بتعمل شيفت + حرف ى مش صعبة والله بس جربوا 
واللى مش هيكتب الهمزة بعد كدا مش هرد عليه علشان الهمزة عندى موضوع حيوى 
معقدة بقى لازم تستحملونى واكيد اللى مش عايز يستحملنى مش هيكون محتاج يكلمنى 
اتفقنا خلاص الحمد لله 

بالنسبة بقى للمدونات اللى اوقات كتير بعلق فيها مرة وعشر مرات لا 
فده يرجع انى مشغولة بس هو انا مشغولة بايه مش عارفة 
بس والله اوقات بدخل مدونات واكتب تعليق وبعدين الجهاز يهنج اقوم قافله التعليق 
قبل ما ينزل واوقات ادخل اقرا ومش بكون عارفة اكتب ايه والحكاية دى بتحصلى كتير على فكرة 
مش بحب اقول جميلة ورائعة وخلاص لو لقتونى عملت كدا يبقى انا بنافق على فكرة 
وياريت تعذرونى ماليش فى المجاملات و كدا واكتر حاجة بتحرجنى وبقف قدامها كتير 
التعليقات اللى بتجيلى على اى بوست بفضل قد نص ساعه كدا
افكر ارد اقول ايه على كل واحد 
بس مينفعش مش ارد عليها ليه بقى
 علشان انا بضايق من الناس اللى مش بترد على التعليقات عندها 
ايوة انت وانت وهو مش بتردوا بتكتفوا بانكم عاملين اشراف على التعليقات وتقروها وخلاص
التعلقات دى تفاعل مش مجرد ابداء اعجاب وخلاص 
وعلشان انا بزعل فمتوقعه ان ممكن حد يدخل عندى ويزعل بردو 

انا كتبت بوست اهو علشان خاطرك انت بس عد الجمايل دى بقى :P
حاسة انك منتظم فى حملة التدوين دى اكتر منى 
فأنا اسفة علشان مش بقيت منتظمة حقك عليا و هى خلصت اساسا 
كل حملة تدوين وانت بتزن عليا انزل تدوينات 
وبتشجعنى وبتقوينى و وووووووو هبقى اقولك الباقى لما اكلمك بقى 
وكل رمضان وانت اقرب ليا من رمضان اللى قبله ;)



Sunday, July 15, 2012

معطف من السعادة



أحبها فى الشتاء و تقدم لخطبتها فى الشتاء ذاته
 واتفقا على ان يكون الزواج فى نهاية الشتاء القادم
لذا كان ممتن للشتاء كثيرا فأهداها معطف بلون المطر
- حبيبتى أحب أن يكون ذلك المعطف اول ما أهديكى ليذكرك دوما بشتاء جمعنا
- كم جميل .... أبيض بلون قلبك
- بل أبيض بلون المطر وسعادتى به ومن ثم سعادتى بكِ
فقد كانت مثله تعشق الشتاء وتهوى إقتناء المعاطف بإختلاف ألوانها
الا انها لم تقتنع يوما بإرتداء معطف أبيض حتى أهداه اليها
لكنها أحبته كثيرا فقد كان رمزا لحبها ولسعادتها ولكل ما هو جميل
على مدار عام من الشتاء الى الشتاء الذى اوشك على الانقضاء سريعا وكأن عام لم يمض
لذا من فرط سعادتى أتحدث دوما علينا بصيغة المجهول فحتى الان لا أصدق ان هى تمثلنى
اليوم سمذهب لتشاهدين منزلك بعد ان انتهى العمل به قالت أمى ذلك فبدأت فى الاستعداد
وما أن خرجت اليها حتى بذات فى الانتقاد
- لما ذلك المعطف فـ الطقس لم يعد قاسيا فقد بدأ الشتاء فى الانقضاء
- حتى وان اصبحنا فى الصيف فلن ادع لحظة سعادة تمر بى دونه
- مجنونة أنتى لا ادرى كيف سيحتملك له الله
- أحبنى خصيصا لجنانى ذلك
قد تكون أمى صمتت او ربما ظننت ذلك فبمجرد خروجنا من المنزل أمطرت السماء
واتجهت أنا فى سعادة الى نافذة السيارة اراقب قطرات المطر المندفعة بشغف الى الارض
لتحتضنها بشوق لا ينقطع الا بقرار من السماء
واتذكر حديثه معى عن المطر
- تحبنى أكثر ام المطر
- أحبك عدد قطرات المطر فهل يمكنك إحصاء عدده
- بالطبع لا وابتسم خجلا واصمت
- عندما تجدين السماء تمطر بقوة أكثر فلتعلمين انى فى تلك اللحظة أحبك أكثر وأكثر
أتذكر كلماته فتغمرنى السعادة أكثر واختبئ فى المعطف أكثر وكأننى أحتضنه هو لأخبره انى أيضا
فمن بداية الشتاء لم تمطر السماء كاليوم كم سعيدة انا به وكم كم أحبه
وها انا الان قد وصلت إليه فى منزلنا الذى لم يعد امامنا سوى بضعة ايام لنسكنه سويا
لكنى لم أجده فأمسكت بهاتفى وأتصلت به ليجيبنى صوت لا أعرفه
يخرنى بان حادثا قد تعرض له وهو يقود سيارته وفقد حياته
ويسود الصمت من جولى فى محاولة للاستيعاب قبل ان ابدو متامسكة واتسأل واين هو الان
لاذهب اليه مخلفة معطفى أمام منزلنا
عل أحد يرتديه فيجلب له السعادة فلم اعد بحاجة لها

Saturday, July 14, 2012

ثنائيات غنائية




ببساطة كدا وبكل وضوح انا عايشة كدا بقلبى المفتوح
على الناس والعالم كله وبنادى زمانى واقوله
انا كلى شباب وآمال وطموح وهروح يا زمان ما ترح ما تروح
وهشوف وياك افراح وجروح كل ده عارفاه كل ده مسموح

هكذا اعيش بمنتهى البساطة اعلم ان الدنيا بها كل شئ
ولكى أصل لما أريد على بأن أأثر فيها قبل ان أتاثر بها
ان اتعرف اولا على معوقات ما سأقدم عليه كى أتمكن من تخطيه بنجاح
حتى وان فأجاتنى على بان امارس جميع تقوس الضعف فى لحظات
كى أصير اقوى وأصنع لحلمى مستقبل من قوة الدموع
وهذا هو التحدى

متخليش حاجة توقفك متسبش الدنيا تكتفك
اقفل باب حزنك على الاخر
افتح باب الفرصة وعافر
كل الحدوتة شوية مجهود

أخلق من حزنك مجالا لإبداع بلا حدود
تغلب على قلبك بالدعاء وعلى عقلك بالعمل
لا تدع للحزن ان يطرق بابك مرة اخرى وحتى وان عاد قاومه بالأمل
لا تيأس من رحمة الله ففى كل اختبار حزن فرصة أفضل للحياة
وما عليك الا التعب قليلا كى تصل لمبتغاك
وهو ما أمرنا به " العمل " والجهد فلا مجال فى تلك الحياة
للقابعين خلف احلامهم مستترين من عرق المحاولة
حاولا مرارا ستصل بكل تأكيد

دور سافر فى القلوب دور فى الزحام هتدوب الالام والاحلام تعيش

تمسك بكل من يفتح لك قلبه بالحب والدعم والنصيحة
أستشعر رضا الله عنك فى قلوب أحبتك مخلصة
ستجد فى قلوبهم السلوى حينا والمآزرة حينا اخر
فجميعنا نحتاج الى من يساندنا ويدفعنا نحو احلامنا ان ضاق بنا المسير
وقد تكون تلك رسائل الله لك كى تساندك فى تحقيق الحلم


ببساطة كدا --- أنغام
متخليش حاجة توقفك ---- منير
عيش ---- خالد سليم

وللثنائية بقية تجدها بقلم الرقيقة رنا 

Friday, July 13, 2012

أريد سؤال ؟



أريد مجال للخروج من فضائى الى سماوات عقولكم
فى محاولة للبحث والتنقيب عنى من خلال انطباعات لم أعلمها بعد
قد يكون كل منا على علم بذاته
قد تكون من هواة جلد الذات مثلى قد تكون مللت من تكرار الاسئلة عليك
فلتدعهم يتبارون فى إلقاء التساؤلات هم أيضا
رب سؤال يحملك لإعادة اكتشاف ذاتك من جديد

أريد نقاش يصحبنى خارج أزقة عقلى الضيقة
 الى ميادين الثقافة المتشعبة من خلالكم 
فجميعنا يتملك جزء من الخبرة والتجار والافكار والثقافات 
وبالنقاش نكتسب و ننضح و نتعلم 
رب سؤال يدفعك الى اكتشاف العالم من جديد 

أريد من يسأل عنى كى يمنحنى جرعة حب مكثفة خالصة لوجه الله 
فرغم تعدد الوجوه اليومية امامنا قد ننسى ان يتسأل اى منا على الاخر 
قد ننسى ان فى سؤالنا صدقة 
حتى اننا قد ننسى ان الابتسامة ذاتها صدقة 
ونمضى كل فى حياته رغم احتياجنا لمثل ذلك السؤال الذى يشعرنا بأهميتنا للآخرين 
رب سؤال أدخلك الجنة 

أريد دعاء بظهر الغيب وحده الله يعلمه يخرج من قلب سليم بنية صادقة 
فتلك هى أيام الدعاء فلتخلصوا قلوبكم لله ولتدعوا بالغيب لأحبائكم 
ولتكثروا الدعاء والسؤال فإن الله يشتاق لاصواتكم و لسؤال قلوبكم 
فلتسؤلوا العفو لإخوانكم ولا تملوا السؤال
رب سؤال ردته إليك الملائكة ولك بالمثل 

تذييل
اللهم إني أعوذ بك من علم لا ينفع 
ومن قلب لا يخشع ومن نفس لا تشبع
 ومن دعوة لا يستجاب لها

Wednesday, July 11, 2012

رسائل إليهن



هن .... صديقاتى 
ذلك الاحساس بإنحناء النون فى حنان لتحتوينا 
وشعور بأن هناك قلب ينقبض لأجلك و يغمره الفرح كذلك لأجلك
هن مجموعة غير متناهية من المشاعر الصادقة دون المطالبة بمقابل 

---------------------

عارفة لما بكون فرحانة اوى او زعلانة اوى بكون محتجالك اكتر حد 
و حتى مش لاقيه احساسى  اول لما بكلمك بلاقيه 
بحبك اوى اصلا مش متخيله قد ايه 
فاكرة لما كنتى بتقوليلى ان شاء الله نتجوز احنا الاتنين فى يوم واحد
واقولك ازاى يا بنتى يعنى انا مش مخطوبة وانتى هتتجوزى اهو 
تقوليلى لا ان شاء الله ربنا هيفرح قلوبنا فى يوم واحد مين عارف
ويكون 3/9 احلى يوم فى حياتى وحياتك وتتحقق دعواتك
وانا اشترى الشبكة فى نفس وقت كتب كتابك
وانا واقفه فى المحل وبنختار بقولهم استنوا اتصل بهبة 
نسمع الزغاريط عند بعض ههههههههههه 
مش قادرة اوصفلك كنت فرحانة قد ايه 
وكل ما اقول لحد انك يوم فرحك كلمتينى اول ما وصلتى بيتك 
يستغرب ويقول علينا مجانين مش عارفة ليه يعنى ههههههههه
تفتكرى جوزك قال علينا ايه وقتها سيباه علشان تطمنينى انك روحتى فيها ايه دى 
بحب حنانا و رغينا و حتى دموعنا و وقفتنا جنب بعض ودعانا لبعض 
وفرحانة جدا الننهارده علشان جبتى نت وهتدخلى كل شوية بقى وكدا
فكان لازم احتفل بيكى واقولك بحبببببببببببببببببببببببببك وربنا يخليكى ليا يارب 

--------------------------

حبيت الشرقية علشانك والله وكنت بفرح باليوم اللى بروح فيه الكلية علشان اقعد معاكى
وانتى بتحللى شخصيتى و بتتوقعى ردود افعالى وانتى بتقوينى وانتى بتنقدينى
فيكى حاجة مميزة ومختلفة و حلوة علشان كدا بحب اقول عليكى احلى لحظة فى الدنيا 
فى تفاصيل كتير مينفعش اقولها عنك علشان احنا علاقتنا سرية للغاية 
بحس انك الدكتور النفسى بتاعى كدا هههههههههههه
فرحانة اووووى انك خلاص سجلتى الرسالة الحمد لله فرحانة بيكى جدا
كل ما افتكر واحنا قاعدين على السلم وكل واحدة بتحلل شخصية التانية 
بفرح بكل الاوقات اللى قضتها معاكم وافرح اننا لسه صحاب 
وانك قريبة منى اوى كدا ونفسى الكتاب ينزل علشان اشوفك بقى 
وتقوليلى رايك وتقوليلى زى العادة
 انتى أطيب مخلوقة فى الدنيا الطيبة دى حاجة نادرة حبى نفسك اكتر 
انا بقيت بحبنى اكتر واكتر كل يوم علشان انتوا موجودين فى حياتى 
وانا بحبببببببببببك انتى اكتر و يارب من نجاح لنجاح 

-----------------------------

انتى بقى رسالة من ربنا ليا
 هو انا مش عارفة احنا بقينا صحاب اوى كدا ازاى 
بس انا فرحانة جدا بالصداقة دى مش هتتيخلى قد ايه 
فرحانة بالساعات اللى بنفضل نرغيها فى التليقون و الكلام معاكى مش بيخلص 
فرحانة بالتشابه اللى اوقات بيكون بنا والروح الجميلة اللى بتربطنا 
والتفاؤل والدعوات و الافكار وووووو حاجات كتير اوى مش ينفع تتعد
بس وقفتك جنبى بكل الدنياااا يمكن مش بقالنا كتير صحاب 
لكن بحس اننا نعرف بعض من سنين كتير اوى 
عايزة اقولك بحبببببببببببببببببببببببببببك يا رونى 

-----------------------------

وهناك بعض الازهار الرقيقة التى تزين حياتى 
لبنى - مها  - أميرة  - منة  - حنان 
تيسير  - مروة  - آمنة  - منى - ريماس
لا مجال للكلمات فيكفى شذى وجودك بجوارى دوما 
أحبكم فى الله 


Tuesday, July 10, 2012

رجل له ماضِ



كانت تدرك بأن ما من رجل بلا ماضِ
فلا تثق فى اى رجل يمر بحياتها هامسا " أحبك "
فقد كانت تنسج فى الخيال حكايا عن عشيقات تحطمت قلوبهن بأيديهم 
و تستمد من ارائهم فى الحياة تفاصيل الحكايا 
فلو انها كتبت تلك الخيالات لاصبحت قاصة محترفة 
الا انها كانت تحتفظ لذاتها بكل تلك الاساطير 
حتى تقنع قلبها بان لا مكان لها فى قلب رجل له ماضِ
تمنت ان يعود الشاطر حسن تكون هى الاميرة الاولى والاخيرة التى سكنت قلبه 
وتجاوزت فى التمنى حد انها كانت تحلم بأن تتجاوز معه بحور الاحزان السبع 
و بأنه حتما سيبنى لها قصرا من الماس فى قلبه 
فلابد ان هناك رجلا لما يسبقها الى قلبه أحد 
مهما حاول الزمن ان يجعلها ماضِ له سيصمد القصر وان تغير قلبه 

-----------------------------------------

لعلهن بخير ... لعل الفرح أمطرهن ..... لعلى أنسى 
كثيرا ما يردد قلبه ويأبى لسانه الاعتراف بأن كثيرات هن من تجرعن 
من كؤوس عشقة مرارة الحب 
يتذكر إحداهن فيضحك كم كانت ساذجة 
 اما الاخرى فقد أحبته بإتقان لكن مع المتقدم الاول كان عليه الانسحاب لتختار 
بينما الثالثة والرابعة والــ...... جميعهن كان لهن السؤال ذاته 
هل كان لك ماضِ ؟ وحقيقة الامر انه لم يخدع اى منهم فكانت إجابته نعم 
لكن ما من أنثى تستلم لفكرة ان مثلها كغيرها فحتما هى استثنائية وستكون آخر من يدخل قلبه
حتما ستنسيه الاولى وتمتلك قلبه بمفردها 
ولكن الا الآن لم يدخل قلبه تلك الاخيرة 

--------------------------------------------

يتمزق قلبى كلما سرح بفكره بعيدا عنى 
رغم كونه زوجى الا انى لازلت متيقنه بأن فكره معها 
همساته وسكناته التى لا أعيها تغدو وتروح الى مرساها 
فقط هى من كانت تفهمه أكثر منه 
أحاول جاهدتا ان أتجاوز بأن لزوجى ماضِ
الا ان ذلك الماصى لازال يسكنه بعد اعوام واعوام من سعادته معى 
لا ألوم قلبه فأنا من أرتضت بأن تكون زوجة رجل له ماضِ
فبعض الحب نتجاوزه ولا يتجاوزنا 

-----------------------------------------------

لا أستطيع خيانتها فلم يتقبل قلبى طرقات أخرى سواها 
تعايشت مع واقعى بمقتضى العقل و بعض طرقات من السعادة 
الا ان سعادتى دوما تنقصها - هى - فللاشياء مذاق مختلف بصحبتها 
رغم محاولاتى لتعويضها بأخرى وإخلاصى و يقينى بأن ما من ماضِ يعود
هناك - هى - فى كل شئ حتى وانا مع سواها تظل هى سيدة القلب والموقف 
أنكرها لكل من حولى ويعترف القلب بخضوعه لها 
لتسير حياتى فى خطين متوازيين واقعيا متقاطعين داخلى دوما 
تبقى لها حياة دونى وتبقى لحياة مستقبل آسير لماضيها 

-------------------------------------------------

حاضر اليوم هو ذاته ماضِ الغد 
ولا يمكنك بناء سعادة على اوجاع الآخرين 
فرفقا بقلوبكم فإن أوجاع القلوب لا تطيب 



Monday, July 9, 2012

فى عينيك عنوانى




ويكفى ان لى وطن فى عينيك يأوينى 
اسافر خلف احلامى فيتبعنى ويحمينى
ومهما غبت فى سفرى بنور ضياه يهدينى
يكفف أدمعى حينا و ببسمة شوق ينسينى 
لتبقى عنيك لى وطن ويظل هواك عنوانى 

" العنوان قصيدة لـ فاروق جويدة " 

Thursday, July 5, 2012

مسميات



" الامل "

أن تدرك بإن السماء حتما ستمطر الفرح وان طال صيف الحلم

" الخيانة "

جرح لا يلتأم مهما حاول الطرف الاخر تغيير المسمى وتجميل موضع الالم

" اليأس "

شجرة يأبسة تسقى بدموعنا لكنها لا تثمر أبدا

" السعادة "

نبحث كثيرا عنها رغم كونها تسكننا

" الصداقة "
وعد أبدى بالبقاء فى الذاكرة

" الاخلاص "

ان تظل على قناعاتك الطاهرة رغم يقينك بزيف الشخوص

" التناقض "

ان تكون انت المذنب والمجنى عليه وتستميت فى الدفاع  فى كلا الحالتين فى اللحظة ذاتها

" التسامح "

حالة من الاخلاق لا تطبقها سوى قلوب تعلقت بالجنة


Wednesday, July 4, 2012

مواجهة خاصة





1/ عرف نفسك ؟


أعشق البدايات ودوما ارتقب لحظات الميلاد
لكن ما أصعب تلك البداية
فأعرب ما فى اليوم ان - انا - تسأل وكذلك - أنا - تجيب
وقد استوقفنى ذلك كثيرا رغم انى من وضعت تلك التساؤلات
لكن لم يخطر بذهنى حينها أنى مثلكم سأجيب
فكيف سأكون فى مواجهتى لا أعلم ربما أحلمنى بعدما أنتهى
لأقف بينكم وأرانى من بعيد كيف كنت
آية محمد ... 24 سنة .... ليسانس آداب اعلام شعبة إذاعة 
مدرسة رياض اطفال ..... مخطوبة  ...... وبس 

2/ ما أكثر ما يميز شخصيتك ؟

بسيطة حد التعقيد واضحة حد التناقض 
هادئة يترأى لهم مجنونة يصفونى عاقلة يظنون 
وبين انا وانا اجدنى استثننائية فى كل شئ سوى ان اتميز بشئ 

3/ ما هى اهم نقطة تحول فى حياتك ؟

حملة التدوين السنة اللى فاتت 

4/ كيف دخلت الى عالم التدوين ؟

من زمان اوى كانت صحبتى عندها مدونة وقالتلى اعمل واحدة واكتب فيها اى حاجة 
كنت عملاها علشان اكتب لصحابى وبس لحد حملة التدوين اللى فاتت 

5/ ما اسم مدونتك ولماذا اخترته ؟

هو اسم ديوانى المفضل وقصيدتى المفضلة لفاروق جويدة 
ولقيت ان دايما دايما فى شئ سيبقى بينا 

6/ صف مدونتك ؟
مدونة زى صاحبتها مجنونة احيانا رومانسية احيانا اخرى 
واقعية وخيالية و بسيطة ومعقدة وكل حاجة واى حاجة 
هى انا فى كل حالاتى 

7/ من هم أكثر ثلاث شخصيات أثروا بك من داخل عالم التدوين ؟ ومن خارجه ؟

آية علم الدين اللى اكتشفتنى ودخلتنى حملة التدوين اللى فاتت 
مصطفى سيف الدين اكتر حد بيشجعنى فى عالم التدوين و بيدينى دفعات معنوية رهيبة 
لبنى احمد نور افكارها وشخصيا وكتاباتها ومن اكتر الناس اللى كانت بتشحعنى بردو
و رنا على و شيرين سامى و رحاب الخضرى و احمد الدسوقى وناس تانية كتير أثروا فيا جدا

8/ ما هى طقوسك الخاصة عند الكتابة ؟

مج نسكافية و فيروز او انغام واحيانا عبدالوهاب 
ومش بكتب غير فى المدونة حتى لو مش هنشره واحفظه لحين الحاجة 
ولو فى فكرة جت فى وقت غلط بكتب اهم رموزها فى نوتس على الموبايل 

9/ ما هو الاسلوب المفضل لديك فى التدوين ؟

الاسلوب العفوى وكتير بكتب ومش بكون عارفة التدوينة هتطلع ازاى فى الاخر 

10/ فى رأيك ما أهم ما يميز تدويناتك ؟

الخاطرة القصصية بحب اكتب بالاسلوب ده جدا 
وده اللى شجعنى انزل كتاب ان مش لقيت كتير بيكتب كدا 
وبيكتب حلو بمعنى ان حد يقوله ان جامد فى الاسلوب ده 
حسيت ان دى بتميزنى بشهادة ناس كتير 

11/ ما هو تقيمك لعالم التدوين فى الفترة الاخيرة ؟

متوسط المستوى 

12/ اختر اقرب تدويناتك الى نفسك وضع رابطها وحدثنا عنها ؟

كل تدويناتى كان ليها خلفية خاصة علشان كدا كلها قريبة منى 
هتلاقوا فى التصنيف قصاقيص جوايا دى انا بعفوية 
و بعض منى انا بردو بس باسلوب أدبى شوية 

13/ استعرض اهم المواقف الغريبة او الطريفة التى صادفتك مع التدوين ؟

كنت قريت تدوينة لمدون صديق و ألهمتنى بفكرة
وكتبت تدوينة بعنوان من فيض أحساسه 
وبعد ما كتبتها كانت عبارة عن جمل منفصلة مش ليها اى علاقة ببعضها 
فقلت اخلى الجملة الطويلة دى تحت والقصيرة دى فوق زى البازل كدا
فضلت الغبطت فى الجمل وبعدين نزلتها 
الاقينى اكتشف بقى انها طلعت قصة وكنت مستغربة جدا
من تعليقات الناس ان نهايتها حلوة 
وانا مش مقتنعه اساسا ان ليها علاقة ببعضها 
ويطلع بقى ان هذا الذى أستلهمت منه الفكرة كان يقصدنى انا بتدوينته اساسا
 وانا كنت عبيطة ولا فاهمة حاجة 
و تدخل الخاطرة كتاب أبجدية إبداع عفوى وأدخل انا قلبه ونتخطب هههههههههه 

14/ هل أحدث التدوين تأثيرا عليك ؟ وكيف ؟

اه تأثير جامد جدااا بقيت بكتب بأسلوب ادبى اكتر و اشتركت فى كتاب و عملت كتاب ليا 

15/ اختر اى مدون ووجه له سؤال ؟

ايووووووووة بقى فرصتى جت 
خالو ابراهيم رزق شايفنى ازاى ؟ " عايزة صورة مفصلة واضحة المعالم :)) "

ومع نسمات الصباح الرقيقة ادعو الله ان تكونوا قد استمتعتم مثلى بذلك اليوم

صباحكم نسمات رضا وسعادة لا تنتهى ان شاء الله 

Tuesday, July 3, 2012

ثرثرة



مش بسكت علشان مش لاقيه كلام لا خالص اصلا 
انا لما بحب حد وارتاحله بكون رغاية جدا واحيانا بحس نفسى غلط
بس لما ببعد واسكت  ببقى عايزة استمتع اكتر بكلامى معايا 
بتبقى وحشتنى افكارى ولغتى و كتبى ببقى وحشانى 

" كثيرا من الصمت وقليلا من الكلام فقد اشتقت لذاتى "

--------------------------

يوم ما اخترتنى اكمل معاك حياتك كنت عارفة انك اخترتنى عقلك 
كنت مبسوطة انك مقتنع بيا بنسبة كبيرة جدا كدا 
بس يوم ما حسيت قد ايه بتحبنى كان أسعد يوم فى حياتى 
ومن يومها والحياة كلها اتغيرت 
الدنيا بقت لابسة فستان جميل وماسكة بوكيه ورد كل يوم الصبح 
تبتسملى وتدينى وردة 

" أنت لـ حياتى ... حياة "

----------------------------

مش عارفة ايه خلانى اقلب فى التدوينات القديمة 
واقراها تانى وافكر اقتبس منها حاجات واقولكم عليها 
يمكن لانى اوقات بلاقى حاجات كنت بحلم بيها اتحققت 
ويمكن لانى بلاقى احساس وقتها كان صعب دلوقتى لما بقراه بضحك 
يمكن لان تدوينك هو الشاهد على احساسك واحلامك 

" بين الحين والاخر أعيد قرأتى كى أفتخر بى "

--------------------------------

وحشتنى اوى ووحشتنى كل حاجة فيك 
بفضل مستنيه السنة كلها علشان تيجى انت عارف بحتفل بيك 
من اول يوم لاخر يوم علشان انت استثنائى فى كل حاجة 
رعشة البرد الخفيفة وصوت الهواء وهو بيوشوش الشجر 
والاشتياق للدفا وبسمة جواها استمتاع حزين 
مش بحبه علشان اتولدت فيه بحبه علشان هو كل حاجة فيه 

" أكتوبر مش بس شهر أكتوبر حالة مش هتلاقيها فى اى شهر "

----------------------------------

انتى اصلا مجنونة اللى هى انا يعنى 
وكأن مجنونة دى حاجة وحشة ورغم محاولاتى الرهيبة فى اقناع كل الناس 
انى مجنونة دى حاجة كويسة مفيش حد راضى يقتنع بردو 
ايه يعنى لما احب امشى على التلتوار فوق الابيض وانط الاسود 
واكل ايس كريم تحت المطر واجرى لو الشارع فاضى 
وايه يعنى احضن كتبى وانا راجعة من المدرسة والناس يفتكرونى طالبة مش مدرسة 
تبقى دى مشكلتى ولا مشكلتهم مش فاهمة يعنى 
وايه دخل الجنان بانى اقول لحماتى انى بحب ابنها هو مش خطيبى ودى الحقيقة 
وايه المشكلة لما احب بجنون واغير بزيادة واسامح بغباء وابقى طيبة طول الوقت 
ايه يعنى لما حد جرحنى واعامله عادى وايه يعنى لما حد أذانى وادعيله 
لو ده جنون فانا مبسوطة بجنانى ده 

" ان لم تجد تصورا لى فلتدعونى بـ مجنونة "

---------------------------------------

متنسوش تدوينة بكرة ان شاء الله موحدة 
وكله يجاوب على الاسئلة بقى
هـــنـــا 







Monday, July 2, 2012

أغدا ألقاك ؟





جلست تتأمل ساعة الحائط فى استلام لدقاتها 
وكأنها ترى صورته خلف زجاجها وضحكاته تعلو إثر دقاتها 
تغمض عينيها لتستمع لدقات قلبها التى تعلو 
أغدا ألقاك يا خوف فؤادى من غدِ
لا تخافه لكنها تخشى ان تنفرط دمعاتها فرحا برؤيته 
او ان ترتجف كلماتها المشتاقه امام ابتسامه عينيه الساحرة 
فتغمض عينيها مرة أخرى لتخرج تنهيدة رقيقة تفصح عما ينتابها 
يالشوقى وإحتراقى فى إنتظار الموعد 
تستحضره داخلها فى محاولة لتجاوز حاجز الزمن لتخبره
  هكذا أحتمل العمر نعيما وعذابا مهجة حرة وقلبا مسه الشوق فذابا
حقا أغدا ألقاك


هامش
* قصيدة أغدا ألقاك غناء أم كلثوم وألحان عبدالوهاب
* اليوم الـ 15 من حملة التدوين سيكون بإذن الله يوم تدوين موحد التفاصيل هــنــا 


Sunday, July 1, 2012

أول مرة



ولميلاد اللحظات الاولى فى حياتى متعة خاصة
قد تتجاوز وصف الكلمات
ربما لا استطيع وصف ميلاد الاحساس الاول
قدر استطاعتى الحديث عن المرات الاولى
ما لا ننساه جميعنا " أول مرة " لاى شئ
عل اول مرة أكتب كانت من أهم لحظات ميلادى الاولى
فقد كنت ف الصف الرابع الابتدائى واول ما كتبته شعر بالعامية
لم ادرك انه عامية حينها ولكن كان لفلسطين الحبيبة فخرج كما هو
هنحارب من أجل القدس هنحارب بدمانا وروحنا
هنرجع مجد الاوطان بسلاحنا وأدينا الحرة
لازلت أحتفظ بالورقة التى تحمل خطى الطفولى وكلماتى العفوية
التى كانت لحظة ميلاد دفعتنى ان أقرا أكثر
وقد كان ديوان شعر " عن القمر والطين " لـ صلاح جاهين
ولم أكن اعرف حينها سوى ان صلاح جاهين
هو من كتب أغنيات سعاد حسنى التى أحبها كثيرا
ولانى كلاسكيه الى حد ما فان اول ما على صوتى بالغناء
تغنيت بـ قالولى هان الود عليه للرائع عبدالوهاب
وكم الاستمتاع وانا اغنى والذى قابله وابل من الهجوم من صديقاتى
وتساؤلاتهم هل افهم ما أغنيه كى اردده ولم يعنينى ذلك شئ
فقط كنت أستمتع وكنت اغنى
أيضا من أجمل المرات الاولى عندما قرأت شعر للمرة الاولى
أمام مدرسى وزملائى ف الصف الاول الثانوى
وقد بدأ لهم الشعر الجاهلى شديد الصعوبة وإحساسى بالتميز
وانا أقرا واتذوق الشعر دونهم وثناء معلمى على فى ذلك
لم أمر بمرات اولى كثيرة فقد بدت حياتى هادئة بعض الشئ
حتى أحببت حقا لا اتذكر تفاصيل ما قد حدث أول الاول
لكننى اتذكر من حبى الاولى الذى استمر لسنوات جرحى الاول
وما اركم الله شرا يوما فإن أسوء ما قد يشعر به المرء خيانة الحبيب والصديق
وقد مررت بكلاهما فى لحظة واحدة قصيرة الامد عميقة الاثر
لكن قدرا من الله ان أكون سببا لجمع شملهما
وفضل من الله ان ابدلنى خيرا كثيرا
فكانت المرة الاولى التى اتذوق بها دموع الفرح
عندما قمت بالاشتراك فى مسابقة للشعر والخواطر وفزت بها
مما مكننى من التعرف على الكثيرين فى هذا المجال
وحملنى قدرى الى أجمل هبة من الله
الى من منحنى إحساسه لأكتب ولأول مرة كأننى " هو "
لتكون فرحتى الحقيقية الاولى "أبجدية إبداع عفوى "
ليحمل الكتاب أول اجمل احساس لى

ولأحمله انا اول بداية حقيقية لى 
ولتتحول اول تجربة نشر جماعية ضمن كتاب " أبجدية إبداع عفوى "
الى " حالات مفردة " اول كتاب خاص بى واول ميلاد لكتاباتى مجتمعة 

قد يكون ميلاد لحظاتى الاولى قليلة لكنها حقا كانت قوية الاثر
حملتنى لأن أستمتع بكل ما يمر بى وكأنه لــ " أول مرة " ....

للإستمتاع بالمزيد من المرات الاولى هتلاقى عند رنا على